Incö huu truáa in sü l’Internet, pêrdêpü dê’l tüt a gratis(!!!!), una nöa Banda müsegala ciamáda „Maltra-B-folk“. E sí cara la mìa géent, “Banda” cunt la “B” bèla granda pêrchè chí bagaj chí fàn minga dê la Müsega dê’l lèla, giamò sentüda e risentüda cuma tanc’ chê fà müsega in „Lengua lucala“: chèla müsega chí a l’è inscí bèla chê la fà cuncurensa a la müsega chê sentum tüc’ i dí a la radio: la fà mínga cuncurensa dumà aj müsegh „dialètaj“ cuma 'l Jannacci, Gaber, Loi, etc. fin al Van De sfroos, tütòltêr! I Maltra-B-folk mí mê piasên tant quant êl Guccini, De Gregori, Dalla, Eric Clapton, The Clash, Gwen Stefani, e.v.i. Dê credêch nò, géent, mi a sunt sensa paròl: la müsêga l’è bèla, fazil dê scultà, e suratüt muderna: na Müsega chê la varda innans e minga indrée. La varda a’l Devegní mía dumà a’l Passáa: na bèla “strèpa” dê la müsega dialètala di agn passáa, semper lí a vardà serücch, a parlà di bèj téemp andáa quand chê la géent la parláva ‘ncamò dialèt, e la scighera la gh’era ancamò, e i terun i gh’era nò, e blah, blah, blah… Tüt êl respèt pêr êl Jannacci & co., ma chí Maltra-B-folk chí, i fà müsega e cünta sü stori chê ghê pias anch aj giuen (e minga pü inscí giuen) e minga dumà a vèc’ dê cent agn! Pö quand chê la canta in “Lengua”chèla Banda chí la “rezita” minga: chi fiö chí parlen un Varesòt s’cèt e sinzer, un “Milanes” un puu ariuus ma ben fazil dê cumprent e minga “rafassunáa” cuma quell dê tanc' puèta dialètaj. Una parláda lucala sinzera: di völt messedáda cunt êl Talian pròpi cuma la parla la geent de tüc' i dí! Un Insübrech Varesòt chê l’è franch, bèl, e chê’l scòlda sü un puu ‘l cör a quij ‘ma mí che vif dêlunsg dê Cà. I düü chê canta gh’hàn tüc’e düü ‘na gran bèla vus, anca sê vün êl parla la “Lengua” püssée mej de l’òltêr: pròpi grant, SÜPER!!!
I cansun di Maltra-B-folk hin tüt bèj, asquas cuma un CD dê “Greatest hits”, ma “Sunt mai andáa in guèra”, “Al circul dê Caidá”, e “Ul mercatin dê’l diaul” mi mê piasen dê matt!!! Innans inscí!! Síi pròpi fort!!! :-)
Chí de suta ghe mèti ‘dèss ‘l liám (link) a la sua pagina web!
www.maltra.it
