Ciao David.... Varda on poo ti cosa l'è che te m'heet fáa fà!!!

Te m'heet fáa fà on para de pass down memory lane.... Sera drée repondett e d'on bott m'hin sgoráa tucc chi pensée chí in del coo... David, sera drée a dìtt, ch'el me sangu l'è nò tutt Lombard (sont anca Tognin) ma el me coeur el batt ancamò denter la "sercia di Navili" intra'l Carrobi e Porta Cica: el batt in del "zenter storegh" de Milàn... El mè Milan: inscí bell, e inscí lontan... Quanc regord, cara la mia gent... La Darsena che par che dess la ghe sia pu, o almanch inscí hoo sentuu... La Fera de Senigaja... d'indoa passavi tucc i sabet in del vegnì a cà, finida la scoeura... Me piaseva da n'oggiada a tucc chi cianfrusaj, chi barlafuss chi, che mai e poeu mai avaria crompà... E poeu la "Piazza Vedera" cont el mercatin di liber vegg a Setember.... La via Vetera e la sova bandera cont la Folc e'l Martell, semper lí in bella vista... E sí Milan d'ona voeulta, quand che al Palazz Marin gh'era minga de la gentaja brutta e prepotenta... La Milàn del coeur in man del Agnasi, del Tognolin: 90 zentimeter de Sindegh stravoeult de 120 zentimeter de nev: l'Inverna del vottantases, che fregg che l'era stáa... Me regordi che sera foeura de cà aj sett or... Sera drée a cor, a fà 'l jogging 'ma se dis incoeu, e la darsena l'era tutta giazzada... e anca el Pilliter l'era minga inscí maa: el gh'eva 'vuu el fidegh de diggh inscí al Kohl de andà a Parch Ravizza... L'orgoeuj de Milan e di Milanes contra l'arorganza e la prepotenza tognina... El parch de dó Basilegh ... La Gesa de sant'Ustorg indova, di voeult, ghe vedevi el Renato Pozzetto cont la sova fioeura che la gh'eva pu o manch i mee istess agn... E dess, in del pensà al Renato Pozzetto, se pò minga pensà nò aj bignée del Gattullo... Ciombia s'eren bon!!! E poeu el gh'era 'l Cucchi... Che bon odor che mi a usmava quand che passava de lá ... E li aprouev al Cucchi, gh'era la mia "vedova" preferida, indoa andava a toeumm via la sed in del mes de Luj quand che a Milàn el gh'è quell còld che smoeuja che'l par che se moeuva gnanca na foeuja... Ma quell còld afos el durava minga: vora de setember gh'era giamò fresch e vora de otober gh'era giamò la schigera.... Quella scighera bella ficcia e umeda che la vegn su de la Darsena e la quatta i ponc in su i Navili... Che par la te dia on basin in su i ganass quand che te veet a spass a la sira... Poeu a Dezember la Fera di Obej, Obej lí in via De Amicis arent a la Gesa di Grazzi... E l'inverna l'è giamò chí... Poeu vegn la fiocca che la teng de bianch i tecc di cà... Va bè, va bè, dess basta!! Dessedes!!! L'è vora de mettes anmò a lavorà!!! Basta cont i regord de cent agn fá!! There seems to be someone waiting to see me just outside my office... They are smiling... I smile back and say: "Come on in... I was just lost in some thoughts and memories... It must be a friday thing... Have a seat... What can I do for you?"

T'heet vist se l'è che te m'heet fáa fà, David??? ;-)

PS El Milanes de chi dò righ chí che t'hoo cuntáa su, David, l'è minga "rezitá", l'è gni antigh gni modern: el vegn de'l coeur, de l'anema, e a tutta quella gent che la dis che la nosta lengua l'è morta e la se parla pu, mi a ghe disi che chi pensée chí, chi paròll chí tráa giò in Milanes in la sova grafia tradizionala, m'i pòden minga trà via!